Vendredi 1 février 2008
5
01
/02
/Fév
/2008
21:44
le blog linguacorsa
Concours
Recommander
Vendredi 1 février 2008
5
01
/02
/Fév
/2008
21:43
Brandon Maria
Dopu ad avè tombu u so ghjacaru cursinu di una fucilata in u chjosu di meli in bassi di u paesi è prima di cacciassila cù a televisò, Brandon Maria spiicò in caffè ch’eddu si vulìa metta una
cartucciata in u zucchinu par veda s’è a vita era andata di megliu. È fà è fà, li sfughjia u curaghju. Spostu nantu à u bancu di u caffè, allisciava di mani u fucili semi automaticu di vinti
balli carcu.
Di stizza, saltarinava, à quandu nantu à u pedi drittu, à quandu nantu à u mancu. (…)
Mossi , erani mossi tutti quanti, à chì in piaghja, à chì in cuntinenti, da godasi l’invirnata in u buliumu vivu di i cità. Inveci quì, feti contu ad essa in calchì sipolcru, ch’avarìani
tiratu l’usciu pà u sempri. Morti vivi, eccu ciò ch’edd’erani, quiddi chì s’erani fermi in paesi. È più morti chè vivi ancu.Da Maghju à Dicembri, ondici paisani s’erani dighjà tiratu u pedi.
Vechji macucchi pà u più.
10 À trent’unu annu, Brandon Maria, issa situazioni ùn la pudìa pata. U troppu stroppia è vi scempia u ciarbeddu.
Da un pizzettu aghjà era briacu cordu. In casa, s’era sbiuttatu i buttigli di a mamma, quiddi allucati à bedda posta pà i parenti in tempu di Natali è di capu d’annu.
In caffè, i soliti pratichi, in cantu di sala, Ghjuvanni Trè viteddi u maciddari, Petru Santu u capitanu à a ritirata, Sulvestru Matangheddu è Mariu di Ninnina. Stinzavani a cartulina, à
l’abitudina, ciuttendu ogni tantu u ditu in u pastizzu da bulicà u cotru vinutu à gallu.
À quidd’altra parti, appuddata in altu, a televisò diciulava à l’assola, senza chì nimu li dessi capu.
Altru nimu, chì bona vìa a mità di u paesi era cuncolta quicci sta sera.
Senza mancu fà attu di salutà quiddi prisenti, u ghjuvanottu si virsiò voltu u bancu.
20 Di una mani scunvolta da i narbi, Dumenicu, u patron’di locu, chì erani apparintati à a longa cù Brandon Maria, li arribiò un bichjeru di wiskhy.
Quiddu t’avìa tuttu di u tontu, capeddi spittinati, i bicchi di camisgia da fora, l’ochji ribuddendu in i caraboni. In fondu avìani smessu di ghjucà ed ascultavani stendu fermi, insicchiti à paru
à iss’animali di punta à u cacciadori.
Pruvò à intaccà à raghjunata dumenicu, ma i paroli escìani malamenti, è barbaticava da a paura chì l’allacciava a bocca. A famiglia, a caccia, i donni…
Infini, tuttu era d’incantu quandu chì u sonu di a televisiò si pisò di sutrattu.
U screnu musciava, colpu in culori, colpu in neru è biancu, paisani di issi cuntrati in sù li forchi à l’Urienti chì currìani assiccati da suldati amiricani.
30 Com’è toccu da a saetta, aguantò u fucili, si vultò Brandon Maria è sparò dui volti in a scatula invispita. Ci fù una sciuppittera trimenti è pò u silenziu, trapanatu da picculi trizinimi
elettrichi di l’apparechju à a malavia. À Ghjuvanni Trè Viteddi è à i cumpagni, li parìa propiu di veda ghjucà calchì filmacciu amiricanu, cù spararii è morti in fantasia ; iè ma, sta sera
tuccarìa forsa à eddi à fà i morti. Francatu un minutu, ch’era ancu pussutu essa un’ora, u tempu s’era allinatu è pisava quant’è pisteddu nantu à i spaddi, è v’acciaccava, u teleffonu ricuccò
daretu à u bancu. Trè cartucci u fecini tacia. (…)
U ziteddu, da sempri l’avia chjamatu cusì Dumenicu, à raghjunà ùn era dispostu.
A sappìa eddu chì Brandon Maria campava solu cù a mamma in una casuchja fora di u paesi. Pruvà, pruvava à buscassi un travagliu in piaghja o pà issu cuntinenti.
40 (…)Campacciava fendu legni. Si tumbava sempri quiddu signari, di sicura, è u li cumpravani in u risturanti citadini. Ma a campa ch’edda c’era a pinsioni di a mamma vechja.
A trent’unu annu, in saluta è forza bramava d’amà una donna è d’accasassi. In paesi i so cuitanni, erani mossi tutti quanti in altrò, à viva, à crescia, inveci d’arritruisciasi, à rializassi
via….à pocu à pocu, tanti guai u si rudìani da indentru à l’usu cancaru.
Sta mani in freccia, à Brandon Maria, u fattori a l’avìa arricata a lettara è quissa, Dumenicu ùn la sapìa.
U sgiò diputatu, in bedda manera, cù carta insistata è infrasati frusti à rombu di ghjuvà, l’annunciava, è li dispiacìa, chì prima l’alizzioni, li vinìa mali assai ad aiutallu. Ma, capulati i
voti, è s’è u populu lu facìa l’anori di ricunducialu à a carica soia, tandu…
50 In casa à Brandon Maria, a mamma vechja pusava in cucina com’edda usava à fà ghjunta a sera, u capu mezu chè sfracicatu da una cartucciata.
In caffè, tutti tacìani. (…) In faccia à u ziteddu, stizza ùn ci n’era più. I so lineamenti erani rigulari è vulintarosi. I so ochji verdi dicisi. Era sbriacatu. Era spuntata a risposta.
Intuppò u fucili, missi a canna ghjustu ghjustu sottu à u baveddu, strignì u chjodu.
I guai vinìani à fini.
Marceddu Jureczek, Ghjuventù, ghjuventù, ghjinnaghju 2007
Vendredi 1 février 2008
5
01
/02
/Fév
/2008
21:37
Brandon Maria
1/ Prisintazioni
Brandon Maria hè toltu da u rumanzuGhjuventù ghjuventù sciutu di Ghjinnaghju 2007 ( edizioni Cismonte è Pumonti) scrittu da Marceddu Jureczek.
Marceddu Jureczek hè natu in lu 1973 in Aiacciu, hè prufissori di Lingua è Cultura Corsa è titulariu di una maestria di storia. Prisidenti di l’associu Matina Latina, capiridattori di a
rivista Avali, sicritariu di ridazzioni di a rivista u Taravu .
U rumanzu hè un ritrattaghju di una ghjuventù corsa ughjinca, l’autori a ci faci veda tal’è quali eddi sò, si tacchieghjani i ritratti, si scontrani i parsunaghji, da cumpona una galeria di
distini fiascati è suffrenti. A vera cronaca di una ghjuventù disincantata, à l’addisperu, tistimonii muti di a falsità pulitica di u 2000, in una sucità priva di valori è di d’avvena.
U scrittu studiatu, Brandon Maria, ci prisenta un ghjuvanottu in campaccieghja in paesi da capu d’annu à Natali cù a mamma vechja, sfaccindatu è à l’addisperu, si
ritrova ind’un locu biotu è à tralascera. I vivi ùn ci stani, si sò mossi in altrò à « goda di u buliumu vivu di a cità » . Ferma quiddu ghjuvanottu di trent’unu annu,
disuccupatu à bramà un’antra vita, finch’eddu ricivissi quidda lettara.
A tunalità di u racontu hè tragica, basta à studià u campu lissicali è a prugrissioni di a storia. À sà u littori chì da u cumenciu l’affari s’ani da imbruttà sin’à a fini. Hè ciottu u littori in
un embiu grevu, in u tragicu « dopu ad avè tombu u so ghjacaru…. ». U parsunaghju principali campa una situazioni suciali tragica : disertificazioni, sulitudini,
disuccupazioni, spaluzzera ecc….
Si pò scuparta u scrittu in parechji stondi, in parechji sceni, :
- da u filari 1 à 06 : Scimizzia, si scopri subitu subitu à viulenza trimenda è a situazioni tragica.
- da u filari 7 à 11 : Ci moscia u paesi duv’eddu campa Brandon Maria.
- da u filari 12 à 36 : in caffè, tiatru di u drama.
- da u filari 37 à 49 : u dilusu.
- da u filari 50 à a fini : chjudenda.
L’autori, in opposta, à i scrittori di u mintenimentu o ancu puri quiddi di u sittanta chì chjamaiani l’aghjenti à vultà in i campagni (Venite cù mè di Ghj. F. Bernardini), chì facìani
l’alligurìa di u paesi, ci dipinghji un locu di malcampà, un locu biotu, pupulatu à « morti vivi », una sucità campagnola rinchjusa. Brandon Marìa, eddu, vò scappà, ùn vò più
stà in issu locu chì simbulizeghja a morti. Hè chjara quì chì l’autori faci u custattu di u fiascu di a rivindicazioni pulitica sittantesca, una leva chì ricusaìa a tralascera di l’internu è chì
u prisintaia com’è a surghjenti. Hè cambiatu segnu, oghji, ùn si tratta guasgi più di u sviluppu ecunomicu è suciali di l’internu, l’internu hè vistu da a ghjuventù com’è un locu d’annoiu pisivu
è biotu. A cità, u fora, ani presu a suprana nant’à i disii sittanteschi. L’internu hè campatu com’è un locu di rinchjusu, di nigazioni è uppostu à i rializazioni parsunali. Ùn si tratta quì di
custruzzioni fundiva di l’identità di l’individu ma di sdrughjitura di l’individu. Ed hè què l’intarressu di issu scrittu, hè issa rumpitura ferma cù a raprisintazioni puetica di u paesi chì hè
stata fatta dapoi anni è anni, propiu in i canzoni o in i puisii, o ancu in i nuveddi. Rumpitura cù a raprisintazioni mintali tradiziunali di u paesi : u paradisu.
Suvitendu u testu, in i primi filari, l’autori ci ciotta in l’azzioni tragica è ci prisenta un ghjuvanottu, Brandon Marìa chì hà tombu u so ghjacaru è chì sbarca à l’annuttà in caffè, briacu
cordu, un fucili carcu.
Brandon Marìa hè un ghjuvanottu di trent’unu annu è pianament’è bè, scuprimu una parsona chì si sprufundeghja in una scimizia murtali. L’autori ci dà l’indicazioni spaziali è timpurali, semi à
ghjorni d’oghji è si passa in paesi. U nomu di u ghjuvanottu stupisci è si pò imaghjinà chì l’autori hà vulsutu crià una rumpitura, chjamendu l’eroiu cusì, ùn semi più in una sucità arradicata à
l’usi, à i tradizioni, quidda chì daia u nomu di u missiavu o di a minanna à un ziteddu, innò quì semi in una sucità campagnola tocca da i mendi muderni. In sucità chì cambia.
U paesi ch’eddu ci prisenta l’autori, hè biottu, u ci discrivi di modu sprizzanti, si sò mossi l’aghjenti, quiddi chì fermani sò vechji chì aspettani falcina, vechji macucchi, sò cusì ch’eddi sò
chjamati da l’autori o Brandon Maria. Morti vivi i paisani, è più morti cà vivi. U cuntrastu hè forti, viulenti semi beddi luntani da a maghjina spachjata da l’autori classichi è sittantesca chì
prisintaiani u mondu paisanu com’è un mondu chì ricusaia a morti, a disertificazioni. In i scritti sittanteschi u paesi hè dipintu com’è un paradisu inveci chì quici nasci u parè d’essa in un
campu santu. Issa situazioni Brandon Marìa ùn la pò più pata. Quì dinò, fattu novu, assenza di risistenza, di prughjettu, l’eroiu pensa à scappà, ùn si tratta quì di stà è di custruiscia.
Custruiscia cun quali ? da quali ?
U locu duva s’aduniscìani i paisani hè u caffè, Brandon Maria si ritrova in caffè, cù i sempiterni figuri pagnuleschi (Pagnol) chì stizzani a cartulina, à l’ora di l’aperitivu. U caffè hè issu
locu in paesi, duva si scontrani i ghjinirazioni, hè un locu pruibitu dinò à cert’ori, locu duva si poni avvilinà i rilazioni trà l’aghjenti sottumissa à l’acolu. Quì scuprimu un locu schiettu
berculatu da a voci di a tiliviziò appudata in altu, è da a sirinità di iso clienti un locu di paci chì torra tiatru di viulenza impazzita.
À traversu, à u patronu di u locu, ni sappemu di più à nantu à Brandon Marìa, campava solu cù a mamma in una casuchja fora di u paesi. Pruvà, pruvava à buscassi un travagliu in piaghja o pà issi
cuntinenti, campacciava fendu legni. Si tumbava sempri quiddu signari, di sicura, è u li cumpravani in i risturanti citadini. Si capisci chì Brandon Marìa ùn si rializeghja è hè sottumissu
à issa vita ch’eddu ùn brama, a campa ch’edda c’era a pinsioni di a mamma (filari 41).
L’ultima infurmazioni ch’è no ricivimu hè chì Brandon Maria spiraia d’essa piazzatu da u diputatu, ma quidda mani ricivì una lettera chì cù bedda manera mandò à l’abissi i so ultimi spirenzi.
Un’antra rumpitura, quidda di a libertà bramata da u sittanta, quidda di l’autodeterminazioni, quidda di a liartà individuali, cù brandon Marìa issi pinsamenti sò mandati à caternu, vultemu torna
à u clientelisimu, ma quì issu clientelisimu hè bramatu è vulsutu.
In l’ultima parti, sapemu chì in a so pazzia sdruditoghja Brandon Marìa s’hè tombu a mamma è si compia anch’eddu.
Cù Brandon Marìa, Marceddu Jureczek ci conta una storia, chì fatt’a fini, si pò leghja in a rubrica di fatti diversi, fatt’à fini una storia cumuna, ma ci voli à dì chì issu sughjettu, quidda di
u dilusu di a ghjuventù campagnola hè un sughjettu novu ind’a litteratura ughjinca, una litteratura chì à traversu novi scrittori à l’usu di Marcu Biancarelli (Prighjuneri, Albiana) vani à trattà
di l’ivuluzioni di a sucità corsa, di i guai di a sucità corsa. Si pò parlà d’opari indiati suciali. Marceddu Jureczek si scrivi ind’una scrittura indiata, in u sensu chì l’autori si trova in u
paesi toccu da prublemi maiori, ma dinò ch’eddi si difinisci eddu stessu com’è portabandera di i senza voci. Issa razza di scrittori quì sò spessu cunsiderati com’è indiati.
Quandu si dici ch’eddu hè indiatu un scrittori, ci voli sempri à pricisà s’edda hè a so scrittura o/è a so parsona. Ind’a noscia situazioni, a situazioni corsa, a mossa sittantesca hà fattu chì
l’indiatura in a scrittura andaia cù i so pedi cù a parsona era u cuntestu sociopuliticu chì purtaia u scrittori à impignà si sempri di più, si spartìa tandu u campà di a ghjenti.
Scrivìa Marceddu Jureczek tempi fà in u numaru 8 d’Avali nantu l’attu di scrittura oghji in Corsica è dicìa chì ùn vidìa oghji autori chì si primuraiani di i guai di a Corsica. Cù Brandon Marìa,
cumparisci subitu subitu u dilusu dopu à a mossa di u Sittanta, impatruniscia si di i so lochi, riviviscia li è mintena à cuntinuità culturali di u populu corsu in casa soia, quì cù issu scrittu
cumparisci a rumpitura è l’addisperu di una sucità malata di ciò ch’edda ùn hè.
Dimanche 9 décembre 2007
7
09
/12
/Déc
/2007
21:12
Nanna di u Cuscionu
In li monti di cuscionu
C’era nata una zitedda
È la so cara mammoni
Li facia la nannaredda
È quand’edda l’annannaia
stu talentu li prigaia
Addurmentati parpena
Alegrezza di mammoni
Ch’aghju da allestì la cena
È da cosgia li piloni
Pà u to tintu babareddu
È pà li to fratiddoni
Quandi vo sareti grandi
Vi faremu lu vistitu
La camisgia, lu guneddu
È l’imbustu ben varnitu
Di stu pannu sfinazzatu
Chì si tessi in Curtichjatu
Vi daremu lu maritu
Addivatu à li stazzali
Un biddissimu partitu
È sarà lu capurali
Di li nostri muntagnoli
Picuraghji è capraghjoli
Quandu andareti spusata
Purtareti li frineri
N’andareti incalvalciata
Cun tutti li muddacheri
Passareti insannicciata
A carramusa imbuffata
Lu sposu vi andrà davanti
Cù li so beddi cusciali ;
vi saranu tutti quanti
Li so cugini carnali
À la zonza di Tavera
vi faranu la spaddera
Quand’arrivat’à lu stazzile
Duve aveti po da stani
surtarà la suciaroni
È vi tuccarà la mani
È vi sarà prisintatu
U tineddu di caghjatu
Dimanche 9 décembre 2007
7
09
/12
/Déc
/2007
21:10
scrittu 4
2. LESSICU
Allestì : préparer
Cosgia : coudre
Pilonu : manteau en poils de chèvre
Vistitu : la robe
L’imbustu : le bustier
U gunellu : un vistitu
A frinera : les freinages
Mugliaccheru : cavaliers
U tineddu : récipient en bois
3. PRISINTAZIONI
A nanna di u Cuscionu saria forsa a più antica di i nanni cunnisciuti, hè stata publicata pà a prima volta da Valery « voyages en Corse et en Sardaigne » (1837) è dinò da Niccolo Tommaseo in u
A nanna hè un cantu monodicu vali à dì chì ùn hè micca accumpagnatu da sturmenti, di regula hè un cantu risirvatu à u spaziu feminili. Hè un mezu di trasmissioni linguisticu, di sucializazioni, hà una funzioni educativa : hà da insignà à u ziteddu i reguli di a sucità induva hà da crescia. Hè un cantu chì t’hà un versu pueticu, tramanda l’usi, ci dà infurmazioni nantu à u locu, nantu à u sessu di u ziteddu ma dinò ciò chì si spera pà l’avvena (a prighera) chì s’affacca sempri sottu à a forma diretta.
Dunqua da prisintà issu cantu ci voli à dì chì a nanna hà parechji funzioni : addurmintà u ziteddu, trasmetta a lingua, sucializà.
A nanna affacca sottu à a forma di puisia è rispondi à tutti i reguli puetichi. Quì, si cumponi di 7 strufati di 6 versi d’ottu pedi (sistina d’ottunari), cù rimi intricciati AB A’B’ CC’. Piglia a forma tradiziunali di u lamentu, di u voceru, di u sirinatu, ma dinò di a paghjella.
Un ci hè micca autori, faci parti di i pruduzzioni di l’uralità, ùn pò essa paragunata à robba scritta chì quì u fini ùn hè tantu a ricerca estetica ma l’infurmazioni ch’edda ci arreca nantu a cultura.
Hè stata trascritta tali è quali à parta si di u cantu.
4. CUMENTU
A dea ginirali : avemu in issa puisia una discrizzioni di l’usi è di i nozzi corsi.
U pianu di u testu :
Si pò scumparta issu testu in trè suvitendu l’enunziazioni :
Prima parti (strufata 1) : hè u narratori chì parla.
Siconda parti (strufata 2) : hè a minnana chì parla à a zitedda è chì li dici ciò ch’edda devi fà a donna in casa.
Terza parti : hè a minnana chì parla è chì insegna à a zitedda u so avvena ( i nozzi).
Riassuntu / analisi :
In issa nanna avemu una discrizzioni di l’usi è di i nozzi corsi cù u parcorsa da criatura à donna. Discrizzioni di l’usi di i nozzi cù a cavalcata di i ghjuvanotti (i mugliaccheri) chì accumpagnavanu u prumessu sposu à circà a spusata. Vultata ch’edda hè a cavalcata cù a sposa, i paisani facini nici di impediscia la d’entra in paesi, fenduli a travata, o parata, o spaddera sionti i rughjoni.
Suvitendu u testu :
1ma parti :
· 1ma strufata : avemu in a prima strufata tutti l’infurmazioni , u locu, u sessu di u ziteddu, a parsona chì canta. « in li monti … » si sà chì a vita si passava in muntagna è chì tutti l’attività si facia in ghjiru à a vita muntagnola (u pasturalisimu). « la so cara mammoni » hè iedda chì canta a nanna par via di a spartera di u travagliu : l’omi travagliavani è spessu sò i donni chì a cantani. S’è a mamma hè affacindata tandu hè a minnana chì annanna u ziteddu. In a sucità corsa di tandu, l’anziani aviani un rolu di tramandera di l’usi corsi (a minnana canta a nanna inveci chì u missiavu conta i foli).
· Siconda strufata : Avemu in issa strufata infurmazioni suciali è matiriali nantu à a famiglia : quì infurmazioni nantu à u travagliu di a donna in casa : allestì a cena, cosgia li piloni). Si sprimi sempri l’affettu trà a zitedda è a minnana (alegrezza di mammoni) ma dinò pà l’altri membri di a casa « babbareddu », ci hè quì sottu intesu una spartizioni di u spaziu umanu : l’omini è i donni. L’omini fora è i donni in casa (à addivà i ziteddi). Dunqua i donni stavanu in casa è intornu à a casa (legnu, acqua, forru…). A donna canta a nanna ma dinò u voceru, voli dì ch’edda hè sempri prisenta à u principiu è à a fini di a vita. U voceru si prisenta sottu à listessa forma (uttunarii) ma ammenta altri affari. S’ è in a prima strufata avemu l’imparfettu pà a discrizzioni, si passa à a sprissioni diretta incù u prisenti. In a terza strufata impieca l’avvena.
- Terza strufata : passa a minnana da « tù » à « voi » è si metti subitu subitu in situazioni di rispettu, tandu s’adirizza à una parsona, hè segnu l’impurtanza di ciò ch’edda hà da cuntà. Ci hè a discrizzioni di un vistitu è tandu ùn si parla più di pilonu ma di beddi vistiti chì a minnana quì prega un avvena bonu à a zitedda , ma ùn ci voli micca creda ch’eddi sò vistiti di l’imaghjinariu, ùn si casca micca ind’a fola. Dunqua ci sò parechji niveddi suciali quì : quiddu di a minnana (povara) è quiddi di i ricchi. U vistitu infurmava nantu à u statutu suciali di a parsona è dunqua pudemu veda chì l’aghjenti campagnola era povara. Bisogna à rimarcà chì u vistitu veni nanzu à u maritu : cù beddi vistiti purdarà pratenda a ghjuvanetta à truvà maritu. Pà truvà un maritu riccu, ci vularà à truvà lu in altrò (chì in paesi ci hè a puvertà) tandu ci vularà à trapassà i reguli chì volini chì a ghjenti di u listessu paesi si maritini trà eddi.
- Quarta strufata : Discrizzioni quì di un matrimoniu trà dui parsoni chì ùn sò di u listessu paesi. Ci voli à dì in prima locu chì u maritu era sceltu da a famiglia è micca da a sposa « vi daremu lu maritu… » ci voli à dì chì a cumunutà famigliali assupraneghja l’individu, hè a famiglia chì dicidi : sò matrimonii di raghjò è micca d’amori. « u partitu » si pò capiscia issa parola da dui maneri : un gallicisimu « un beau parti » ma dinò ci faci pinsà à u partitu (puliticu) sarà tandu u maritu u capipartitu (u capurali).
- Quinta strufata : Ciò chì ci parmetti di dì chì i sposi sò di dui paesi sfarenti sò chì quandu i sposi erani di u listessu locu s’andava à pedi è quandu erani di paesi sfarenti, s’andava à cavaddu. « li muddaccheri » accumpagnavani i sposi à a cunfina di i dui paesi è faciani nici di batta si. I muddaccheri chì erani di u paesi di a donna ricusavani di lascià la parta, parchì era a donna prudutrici di bracci pà u travagliu.
- Sesta strufata : ci sò sempri rinsignamenti nantu à i statuti di l’omini è di i donni « lu sposu andrà davanti ». U matrimoniu hà da lià dui famigli, dui cumunità. Si pò parlà di l’abbracciu chì parmetti à i prumissi sposi di campà insemi nanzu d’essa maritati. L’abbracciu hè privatu è si faci in casa cuncerna cà dui famigli inveci chì u matrimoniu hè sacru (tocca à a rilighjoni), si faci in ghjesgia è hè ricunnisciutu da i cumunità. Si pò parlà di scappaticciu quandu chì si escia da i reguli di a sucità postu ch’eddi erani stretti i reguli è chì u maritu era impostu. Andavanu i scappaticci a Dumenica à a messa à u mumentu di l’elevazioni è tandu erani ublicati i genitori d’acittà u matrimoniu, basta ch’eddi scappessini un ghjornu.
- Settesima strufata : « surtarà la suciaroni » si pò parlà di u rapportu particulari trà a sociara è a nora : ghjilusia è cuncurenza parchì si « spartini » u listessu omu è a listessa casa. A donna campava cù i parenti di u maritu : a sociara li dava a « chjavi di a casa » hè simbolicu, pà dì chì parmissu à a nora d’andà in tutti i pezzi di a casa. Puri, i reguli di l’uspitalità faciani chì un stranieru ùn avia u drittu d’andà in certi pezzi di a casa. « vi tuccarà la manu è vi sarà prisintatu u tineddu di caghjatu » semu ind’a listessa simbulica fora chì a sposa hè acittata da a sociara è li dà à ghjisticcia avali a pruduzzioni casana.
5/BILANCIU
A nanna com’è a fola t’hà una funzioni di sucializazioni è d’educazioni : tramanda à u ziteddu i reguli di a cumunità. Appronta l’individu à accittà i reguli.
Calendrier
| Février 2012 | ||||||||||
| L | M | M | J | V | S | D | ||||
| 1 | 2 | 3 | 4 | 5 | ||||||
| 6 | 7 | 8 | 9 | 10 | 11 | 12 | ||||
| 13 | 14 | 15 | 16 | 17 | 18 | 19 | ||||
| 20 | 21 | 22 | 23 | 24 | 25 | 26 | ||||
| 27 | 28 | 29 | ||||||||
|
||||||||||