Una Spirienza bislingua pà u cullegiu San Paulu d’Aiacciu

Sò dui anni  avali, ch’eddi sò criati sezzioni bislingui in scola di sesta è di quinta. Sò 40 alevi chì suvitani insignamenti in corsu è in francesi.

Bisogna à dì chì à cumenciu ci hè stata una forti vulintà di a direzzioni è di l’insignanti di San Paulu di creà un prughjettu ingiru à a lingua corsa ed hè cusì chì parechji si sò trovi à passà l’abilitazioni in lingua corsa.

Oghji ch’è oghji si trova u stabulimentu cù una bedda squadra pedacogica chì ingira l’alevi in dui scoli.

L’alevi ricevini un isignamentu in corsu è in francesi in tutti i materii com’è pà u francesi è a musica cù m. Massa, a storia cù m. Bizari, l’inglesi cù mma Campinchi è mma Ettori, u corsu cù monsieur Solinas, i scenzi di a vita è di a terra cù mma Mattei, l’educazioni fisica è spurtiva cù monsieur Piccioli è monsieur Alessandri, i matematichi cù madama Brescaglia, u disegnu cù mma Biasini.

Annu l’alevi di sesta, si sò trovi à a fiera di Bucugnà, ani appruntatu cù mma budroni è mma giovannai di u CDI un librettu di prisintazioni di u casteddu Baciocchi, ci hè statu ancu un articulu nantu à u Journal de la Corse, nantu à una visita à l’archivi d’Aiacciu.

Sò privisti quist’annu parechji surtiti, Fin’di Sittembri è à cumenciu di Ghjugnu, in muntagna da capì ciò ch’edda hè a campagnalità corsa.

Micheli Solinas

Prufissori di corsu

Marie Guerrini

 

Le Chemin des Dames

                                                                                      Luni 30 d’ Aprili di u 1917     

                                                    O la me cara mammuccia

Sogu ghjòvanu valenti è curaghjosu ma a guerra hè gativa , voltu à edda sogu frolu è tappareddu .

I ghjorni pàssani è mi veni l’ addisperu, tandu ripensu à a me ziteddina , à issi ghjurnati di branu quand’eddu accarizzaiani u me spinu i dolci raghji di u soli mentri chi cù Dumenicu scuzzulavamu u chjarasgionu fiuritu. I nostri risati ribumbavani in u paesu sanu mischiendu si à i voci di l’omi chi s’alzaiani à i quatri scorni di i prati.  Certi volti, nant’à u chjassu di a scola, scuprìa à, Francesc’Antonu zappendu u so ortu . Oghji, nant’à u Chemin des Dames , scopru, u nimicu chì avanza pocu à pocu …Quì , ùn ci hè micca u branu , i cadàvari rimpiàzzani i fiori è i sciupittati, i risi zittiddini . Mi rivecu, à l’attrachjata , andendu à circà u latti , è quandu sarru l’oghji, sentu torna u dolci parfumu di a natura di issi seri quallà . Issi seri duva ribombani i sturmenti di musica chì ritimaiani u passu di i paisani sinu à l’alba . e pò c’era vechju Bianchini chì a sera à a vechja ci cuntaia foli di l’altru mondu, mi dò u so viulinu è ogni ghjornu di festa sunàiami insemi . Era pòvera ma a me  vita  fatta à mumenti cusì maravigliosi  era splèndida , erani tempi beddi …

 

        M’arricordu nantu à u battellu quandu aghju vistu a me terra alluntanassi da mè pianu pianinu . Aghju lacatu u paradisu pà l’infernu .Ci hè una ghjustizia ? Innò o Mà … sogu innucentu di ciò chi si passa in quissu locu ma ne pattimu quantunqua noi ! Aghju arrigalatu a me vita pà una patria chì ùn hè micca a meia…avali mi dumandu quandu vultaraghju in casa mea ! Ma sta sera ò Mà, m’hè parsu chi u tempu nant’à u Chemin des Dames s’hè firmatu par mè .

 

Ti tengu caru

 

                                                                           Petru u to fighjolu .

 

Cirigliu Giacomoni

Le chemin des dames

Si dici chi à l'ora di a morti, si rivedi à spiccera una vita sana, fiuri di stondi diliziosi o di i cuntrarietà.

Eddu, ferma quì in bocca à l'orsu à fighjulà u filmu di a so vita scorsa , matriculeghja.

Comu hè ch'eddi m'ani mandatu quì ? chì possu fà quì eiu, tintu di mè ? 

Dulori è addisperu ! sò quì in stu locu chì porta un cusì beddu nomu « le chemin des dames ». Chì beddu nomu, o tamantu maceddu ! o chì scumpientu !

M’anu dittu ch’eddi erani i diliziosi figlioli di un rè chì pigliavanu suventi issa stretta…o s’eddi vultaiani oghji ! o quant’eddi sariani addispirati ! addispirati quant’è mè !

Ma parchì m’ani mandatu quì ? Sariu statu cusì bè cù Miola. Miola chì forsa avali hè à a bucata ? Saraiamu stati cusì bè à stenda nantu à u pratu tamanti panni sbiancati da u soli,

À l’intornu l’aceddi sbulachjeghjanu è chì disgrazia d’ùn sapè bulà !

Eccuti à Miola ! Ochji spenti sunnieghja. Mi stocu vicinu è fighjulendu la u me estru si ni fughji. S’è socu culà è chì culà si ni stà a me vita.

Più in là, un filu di fumu scappa da un pagliaghju, saria una bedda cosa di suvità lu ma… !

Pensu chì dopu à a munta in u compulu s’arrusti un pezzu di panzetta. Sentu u muscu di l’aliva è mi veni u gustu di u pani impichjinatu.

Mì à francesc’antone chì si ni và à zappà l’ortu. Più  sottu, in portu, baddani i barchi. Quì hè a me vita…

Avà mi veni a scola è u tavuloni. Sentu cridà un’andata di ziteddi chì corrini è si parsiguiteghjani. Mi piglia u fretu tamantu è a tremuledda quandu mi voltani i canzoni di missiavu. Com’eddu saria stranu è bè di vultà à a ziteddina ?

Voltu l’ochji è vecu à fasgianu u sameru di ziu Battì chì ghjunghji carcu à legni.

Mi pari ch’eddu pienghji u paesi, forsa ch’eddu pienghji i ziteddi cascati pà una causa incerta, pà nudda ? o forsa ch’eddu pienghji pà mè ?

In tantu sò quì ed hè quà a me vita !

Un chjoccu di campana è u me cori s’avvicina d’a ghjesgia. Mi piaci l’invernu soca calchì nustalgia di i festi nataleschi ? Stondi schieti di goia sirena, segnu di rinascita. Mi scaldu à u focu . dui tizzoni brusgiani.

A piaghja, a noscia tinta piaghja si ni stà cutrata com’è mè  è com’è mè inferma  aspetta u mesi d’Aprili da rinascia cù u soli ma eiu aspettu a fini

L’aria si rinfresca è mi pari di senta u ventu in i pini. Mì à Roccu chì trinca di viulinu è chì accumpagna u ventu,

U branu ! vecu u chjarasgionu fiuritu è sò centu pastori chì fiscani i pecuri pà i prati. Chì filicità ! stondi inchjudati in u me cori, prufondu, prufondu, prufondu in mè.

Hè quissa quì a me vita , hè com’è a nevi nantu à i monti….Voltu…o la me ghjenti !

O i me lochi ! voltu, voltu ….